Elm və Təhsil Nazirliyinin İqtisadiyyat İnstitutunun yaradılmasının 67 illiyi münasibətilə tədbir keçirilib. 1958-ci il aprelin 14-də təsis edilmiş İqtisadiyyat İnstitutunda bu tarix hər il “İnstitut günü” kimi də qeyd olunur.
Bu barədə AZƏRTAC-a institutdan bildirilib. Tədbirdə İqtisadiyyat İnstitutunun baş direktoru iqtisad elmləri doktoru professor Nazim Müzəffərli müəssisənin yaranması tarixindən, keçdiyi şərəfli inkişaf yolundan, Azərbaycan iqtisad elminə və ölkə iqtisadiyyatına verdiyi töhfələrdən danışıb. O bildirib ki, müstəqillik illərində İqtisadiyyat İnstitutu Azərbaycanın müstəqil milli iqtisadiyyatının formalaşdırılması və inkişafı istiqamətində sanballı elmi-tədqiqat işləri yerinə yetirib, peşəkar milli kadrların hazırlanması sahəsində mühüm xidmətlər göstərib. Azərbaycanda fundamental elm mərkəzi olmaqla ölkədə tanınmış iqtisadçılar nəsli yetişdirib. Burada uzun illər görkəmli iqtisadçı alimlər çalışıblar.
İclasda şöbə müdirləri - AMEA-nın müxbir üzvü, professor Şahbaz Muradov, professorlar Tofiq Hüseynov və Tərbiz Əliyev çıxış edərək institutun Azərbaycanda iqtisad elminin inkişafındakı rolu, mövqeyi və əhəmiyyətindən, zəngin tarixi inkişaf yolundan danışıblar. Qeyd olunub ki, 55 il ərzində mövcud olmuş dissertasiyaların müdafiə şuralarında 900-dən artıq fəlsəfə doktoru, 100-dən çox elmlər doktoru işi müdafiə edilib. İnstitutun həmin yetirmələri Azərbaycan iqtisadiyyatının idarə olunmasına və inkişafına böyük töhfələr veriblər, hazırda da dövlət qurumlarında, ölkə parlamentində uğurla təmsil olunurlar. Azərbaycanda fundamental və tətbiqi iqtisadi araşdırmaların əsas mərkəzlərindən biri olan İqtisadiyyat İnstitutunda müstəqil milli iqtisadiyyatın sosial-iqtisadi inkişaf problemləri ilə bağlı fundamental tədqiqatlar aparılır. İnstitutun hazırda yerinə yetirdiyi elmi-tədqiqat istiqaməti Azərbaycan Respublikasının Prezidenti tərəfindən təsdiq olunmuş “Azərbaycan 2030: sosial-iqtisadi inkişafa dair Milli Prioritetlər”ə, eləcə də “AMEA 2020-2025-ci illər üçün inkişaf proqramına” uyğun olaraq müəyyənləşdirilib.
İnstitut Azərbaycan Respublikasının Prezidenti tərəfindən təsdiq olunmuş dövlət proqramlarının və Nazirlər Kabinetinin qərarlarının icrasına dair müvafiq dövlət qurumları ilə sıx əməkdaşlıq edir, onların sifarişlərini yerinə yetirir və birgə tədqiqatlar aparır. Habelə ölkənin aparıcı universitetləri ilə elm və təhsilin inteqrasiyası məqsədilə birgə layihələr həyata keçirilir. İnstitutun əməkdaşları hökumət qurumlarının iqtisadiyyatla bağlı 10-dan artıq işçi qruplarında ekspert qismində təmsil olunurlar. Qarabağda yeni iqtisadiyyat quruculuğu sahəsində institutun apardığı tədqiqatlar dövlət tərəfindən yüksək qiymətləndirilir.
Vurğulanıb ki, İqtisadiyyat İnstitutunun strateji hədəfləri yaxın perspektivdə Azərbaycanda fundamental iqtisadi tədqiqatların real mərkəzinə, iqtisadi tədqiqatların əsas əlaqələndiricisinə, hökumətin kollegial ekspertinə və məsləhətçisinə çevrilməkdir.
AZƏRTAC 14.04.2025
525-ci qəzet, 525.az saytı 14.04.2025
