27 Sentyabr - Anım Günü ilə əlaqədar Elm və Təhsil Nazirliyinin İqtisadiyyat İnstitutunda tədbir keçirilib. Öncə şəhidlərimizin ruhu bir dəqiqəlik sükutla yad edilib.
Tədbiri giriş sözü ilə açan İnstitutun baş meneceri Şakir Alıyev bildirib ki, Ermənistanın ölkəmizə qarşı 2020-ci il sentyabrın 27-dən başlayan növbəti hərbi təcavüzünə cavab olaraq, Azərbaycan Respublikası Silahlı Qüvvələri Ali Baş Komandanın rəhbərliyi altında işğal altındakı torpaqlarımızın azad edilməsi məqsədilə Vətən müharibəsinə başlamışdır. Ordumuz 30 ilə yaxın erməni qəsbkarlarının tapdağında qalmış torpaqlarımızı işğaldan azad etmişdir. Ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq, Azərbaycan Respublikasının Prezidenti İlham Əliyevin 2020-ci il 2 dekabr tarixli Sərancamı ilə hər il sentyabrın 27-si Azərbaycan Respublikasında Anım Günü kimi qeyd edilir. Bu qələbənin əldə olunmasında qəhrəman Azərbaycan əsgərinin göstərdiyi igidlik, şücaət xalqımızın yaddaşında əbədi yaşayacaq, gələcək nəsillərə örnək olacaqdır.
Tədbirdə çıxış edənlər – Tanrıverdi Paşa, Şəfəq İslamova, Sevda Mikayılova, Famil Rüstəmov, Elnur Zeynalov və digərləri 44 günlük Vətən Müharibəsi nəticəsində əldə olunmuş böyük qələbədən, bu qələbəyə aparan yoldan, hazırda işğaldan azad olunmuş torpaqlarımızda həyata keçirilən nəhəng quruculuq işlərindən, insanların öz dədə-baba yurdlarında məskunlaşmasından danışıblar.
Qeyd olunub ki, Vətən müharibəsində Silahlı Qüvvələrimizin 2783 nəfər hərbi qulluqçusu həlak olmuş, yüz nəfərdən artıq hərbi qulluqçumuz itkin düşmüş, min nəfərdən artıq hərbi qulluqçumuz yaralanaraq sağlamlığını itirmişdir. İşğal altında olan torpaqlarımız qəhrəman şəhidlərimizin, əsgər və zabitlərimizin, qazilərimizin qanı və canı bahasına azad olunmuşdur. Anım Günü şəhidlərimizin müqəddəs xatirəsinin uca tutulduğu, onların ruhuna ehtiramla baş əydiyimiz gündür. Azərbaycan hər zaman mübariz oğul və qızlarının şücaətini yüksək qiymətləndirir, bütün şəhidlərimizin ruhuna ehtiram göstərir, xatirəsini uca tutur.
Allah şəhidlərimizə rəhmət eləsin!
Qazilərimizə can sağlığı versin!
