Elm və Təhsil Nazirliyinin İqtisadiyyat İnstitutunda 20 Yanvar faciəsinin 36-cı ildönümünə həsr olunmuş anım tədbiri keçirilib.
İnstitutun baş meneceri Şakir Alıyevin sədrliyi ilə keçirilən tədbirdə çıxış edənlər – aparıcı elmi işçi Tanrıverdi Paşa, professor Tofiq Hüseynov, i.e.d. Sevda Mikayılova, dosent Mahir Zeynalov, gənc tədqiqatçılar Mələk Əliyeva, Cavanşır Burhanzadə və digərləri 1990-cı il yanvarın 19-dan 20-nə keçən gecə sovet ordusunun Azərbaycanda həyata keçirdiyi qətliamdan, o dövrün reallıqlarından, ictimai-siyasi hadisələrdən, xalqın birliyindən və öz haqqları uğrunda mübarizə əzmindən danışıblar. Habelə 20 Yanvar hadisələri zamanı şahidi olduqları hadisələri bir daha xatırlayan çıxışçılar xalqımızın milli azadlıq hərakatını, qəhrəmanlığını, şücaətini, Qarabağ uğrunda mübarizəsini, dövlət müstəqilliyimizin əldə olunmasını, qorunmasını və möhkəmləndirilməsini böyük tarixi nailiyyətimiz kimi qeyd ediblər.
Çıxış edənlər o dövrün ictimai-siyasi proseslərinə diqqət çəkərək faciənin baş verməsi səbəblərindən, xalqımızın həmin ağır günlərdə biliyindən, insanların azadlıq mübarizəsindən, fədakarlığından söz açıblar. Qeyd olunub ki, 20 Yanvar hadisələri xalqımızın tarixində ən qürurlu, ən şərəfli gündür. Xalqımız həmin vaxt bir daha dünyaya göstərdi ki, onun müstəqillik və azadlıq mübarizəsinin qarşısını heç bir qüvvə ala bilməz. 20 Yanvar şəhidləri həmişə hörmətlə yad ediləcək. Bu gün Qarabağın işğaldan azad olunmasına, müstəqil Azərbaycanın ərazi bötövlüyünün təmin edilməsinə, üç rəngli bayrağımızın bütün ölkə ərazisində qürurla dalğalanmasına görə bütün şəhidlərimizin ruhları şaddır.
Azadlıq, müstəqillik və Qarabağ uğrunda canını fəda etmiş bütün şəhidlərimizin xatirəsi xalqımızın qəlbində əbədi yaşayacaq! (economics.org.az).
