Elm və Təhsil Nazirliyinin İqtisadiyyat İnstitutunun İnklüziv sosial inkişaf şöbəsinin əməkdaşlarının “İnklüziv sosial inkişaf” adlı kollektiv monoqrafiyası nəşr olunub.
Kitabın müəllifləri iqtisad elmləri doktoru (i.e.d.), professor Rəsmiyyə Abdullayeva, i.f.d., dosent Jalə Əliyeva, i.f.d. Firdovsi Şahbazov, i.f.d. Vəfa Həşimova, i.f.d. Elnur Zeynalov, i.f.d. Aygün Təhməzli, Günəş Nəbiyeva, Mələk Əliyeva, Amaliya Allahverdiyevadır.
İqtisadiyyat İnstitutunun Elmi Şurasının qərarı əsasında çap edilən kitabın elmi redaktoru professor Rəsmiyyə Abdullayeva, rəyçiləri i.e.d. Allahyar Muradov, i.e.d. Yaşar Məmmədov və i.f.d., dosent Pərviz Həsənovdur.
Monoqrafiyada inklüziv sosial inkişafın nəzəri əsasları, səhiyyə, sosial müdafiə, sosial sığorta, sosial yardım, pensiya sistemləri, gəlirlərin yenidən bölgüsü, həyat keyfiyyəti problemləri tədqiq olunmuşdur. Azərbaycanda inklüziv sosial inkişafın mövcud vəziyyəti qiymətləndirilərək onun gücləndirilməsi istiqamətləri göstərilmişdir.
Kitab elmi işçilər, ali məktəb müəllimləri, tələbələr, doktorantlar və geniş oxucu kütləsi üçün nəzərdə tutulmuşdur.
