Azərbaycan Respublikası Elm və Təhsil Nazirliyinin İqtisadiyyat İnstitutu ilə M.Rıskulbekova adına Qırğızıstan İqtisad Universitetinin İqtisadiyyat İnstitutu arasında onlayn formatda görüş keçirilib. Tədbirdə hər iki qurumun bir qrup rəhbər heyəti iştirak ediblər.
ETN İqtisadiyyat İnstitutunun baş direktoru, professor Nazim Müzəffərli rəhbərlik etdiyi elmi müəssisənin əsas fəaliyyət istiqamətləri, akademik heyəti, fundamental elmi tədqiqat mövzuları, elmi nəşrləri, dövlət və hökumət qurumlarının sifarişi ilə həyata keçirilən layihələr və s. barədə geniş məlumat verib. Son illər Türk dövlətləri arasında artan siyasi və iqtisadi əlaqələri, bunun Qırğızıstan və Azərbaycan arasında elm sahəsində də əməkdaşlıq üçün yaxşı fürsətlər yaratdığını qeyd edib.
Qırğızıstan İqtisad Universiteti İqtisadiyyat İnstitutunun direktoru, Elmi Şuranın sədri, iqtisad elmləri doktoru, professor Batırkul Baetov Qırğızıstan və Azərbaycan arasında qarşılıqlı etimada əsaslanan siyasi, iqtisadi, elmi əlaqələrdən danışıb. Rektor rəhbərlik etdiyi İnstitutun strukturu, akademik heyəti, əsas fəaliyyət istiqamətləri, elmi tədqiqatları barədə geniş məlumat verib. Habelə ETN İqtisadiyyat İnstitutu ilə birgə layihələrin həyata keçirilməsinin, beynəlxalq elmi araşdırmaların, birgə tədqiqatların aparılmasının əhəmiyyətini vurğulayıb.
Görüşdə ETN İqtisadiyyat İnstitutu ilə Qırğızıstan İqtisad Universitetinin İqtisadiyyat İnstitutu arasında əməkdaşlıq əlaqələrinin genişləndirilməsi, birgə layihələrin həyata keçirilməsi və tədqiqatların aparılması imkanları ətrafında geniş fikir mübadiləsi aparılıb. Prof. N.Müzəffərlinin təklifi ilə prof. Batırkul Baetov ETN İqtisadiyyat İnstitutunun "İqtisadi artım və ictimai rifah" elmi jurnalının redaksiya heyətinin tərkibinə daxil edilib. (economics.org.az).
