Elm və Təhsil Nazirliyinin İqtisadiyyat İnstitutunun Biznes mühitinin tənzimlənməsi və sahibkarlığın inkişafı şöbəsinin müdiri, i.e.d., professor Tərbiz Əliyevin və İnnovativ iqtisadiyyat və rəqəmsal transformasiya şöbəsinin elmi işçisi, i.f.d. Aytən Əbdürrəhmanovanın “Azərbaycanın mebel sənayesində sahibkarlıq fəaliyyətinin təşkili” adlı monoqrafiyası nəşr olunub.
İqtisadiyyat İnstitutunun Elmi Şurasının qərarı əsasında çap edilən kitabın elmi redaktoru professor Tərbiz Əliyev, rəyçiləri professor Füzuli Məmmədov və i.f.d., dosent Rahim Sadıqovdur.
Monoqrafiyada mövcud nəzəri-metodoloji baxışlar, beynəlxalq təcrübələr nəzərə alınmaqla mebel sənayesində sahibkarlıq fəaliyyətinin təşkili və idarə edilməsinin aktual məsələləri tədqiq edilmiş, çoxillik statistik və beynəlxalq təşkilatların məlumatları əsasında, müxtəlif təhlil metodlarından istifadə etməklə, onun mövcud vəziyyəti geniş təhlil edilib qiymətləndirilmişdir. Mebel sənayesində biznes prosesinin təşkili, biznes-planların işlənilməsi və reallaşdırılmasının metodoloji aspektləri şərh olunmaqla müvafiq ehtiyat imkanları aşkara çıxarılaraq səmərəli istifadə edilməsi yolları göstərilmişdir.
Tədqiqatın məntiqi nəticəsi olaraq monoqrafiyada mebel sənayesində dövlət-özəl sahibkarlığın dəstəklənməsi, sosial sahibkarlığın inkişafı, KOB klasterinin yaradılması, riskin tənzimlənməsi, süni intellektin genişləndirilməsi, istehsalın şaxələndirilməsi strategiyasının formalaşdırılması, eləcə də sahənin dayanıqlı inkişafının başlıca istiqamətləri üzrə metodiki, əməli xarakteri təklif və tövsiyyələr verilmişdir.
Monoqrafiya mebel sənayesinin rəhbər işçiləri və layihə menecerləri, elmi işçilər, doktorantlar, magistrlər, startaplar, fərdi, mikro və kiçik sahibkarlar üçün nəzərdə tutulmuşdur.
