Aprelin 27-də Azərbaycan Respublikası Elm və Təhsil Nazirliyi İqtisadiyyat İnstitutunda növbəti daimi elmi seminar keçirilib.
İnstitutun icraçı direktoru, dosent Famil Rüstəmovun sədrliyi ilə keçirilən seminarda “Aqrar sektorun iqtisadi problemləri” şöbəsinin müdiri, iqtisad elmləri doktoru, dosent Yunus Sadıqov “İtirilən iqtisadiyyat” mövzusunda məruzə ilə çıxış edib.
Məruzədə ölkə iqtisadiyyatında müşahidə olunan inkişaf meyilləri ilə yanaşı, qeyri-neft sektorunda mövcud olan istifadə olunmamış iqtisadi potensial, əlavə dəyər yaratmaq imkanları və bu imkanlardan daha səmərəli istifadə məsələləri barədə fikirlər səsləndirilib. Bildirilib ki, iqtisadi resurslardan, istehsal və investisiya imkanlarından daha səmərəli istifadə edilməsi qeyri-neft sektorunun inkişafı, məşğulluğun artırılması və əlavə dəyər zəncirlərinin genişləndirilməsi baxımından mühüm əhəmiyyət daşıyır.
Çıxışda biznes mühitinin təkmilləşdirilməsi, rəqabət mühitinin inkişafı, inflyasiya prosesləri, bank kreditlərinin real sektora yönəldilməsi, iqtisadiyyatın diversifikasiyası, emal sənayesinin inkişaf imkanları, əmək bazarının struktur xüsusiyyətləri və əlavə dəyər zəncirlərinin formalaşdırılması kimi məsələlərə toxunulub. Məruzəçi istifadə olunmayan iqtisadi potensialın və itirilmiş imkanların qiymətləndirilməsi ilə bağlı beynəlxalq təcrübə əsasında aparılmış araşdırmanın bəzi nəticələrini də seminar iştirakçılarının diqqətinə çatdırıb.
Məruzə ətrafında geniş elmi müzakirələr aparılıb. Çıxışda səsləndirilən bəzi yanaşmalar seminar iştirakçıları arasında fikir mübadiləsi və elmi mübahisələr doğurub. Müzakirələr zamanı mövzunun nəzəri-metodoloji əsasları, “itirilən iqtisadiyyat” anlayışının iqtisadi kateqoriya kimi işlədilməsi, istifadə olunmamış potensialın ölçülməsi imkanları və bu istiqamətdə daha dəqiq elmi yanaşmaların formalaşdırılması ilə bağlı müxtəlif fikirlər bildirilib.
Seminar maraqlı fikir mübadiləsi şəraitində keçib, iştirakçıların sualları cavablandırılıb.
