29 aprel 2026-cı il tarixində "Zhuoce Consulting Services Co., Ltd." tərəfindən Çin müəssisələrinin Mərkəzi Asiya və Cənubi Qafqaz regionunda investisiya fəaliyyəti, mövcud çağırışlar və perspektivlərə həsr olunmuş "İnkişaf və çağırışlar: Çin müəssisələrinin investisiya və tikinti sahəsində yeni yolları" mövzusunda beynəlxalq onlayn elmi konfrans keçirilmişdir.
Zoom platforması üzərindən onlayn formatda baş tutan tədbirdə ETN İqtisadiyyat İnstitutunun “Xarici iqtisadi fəaliyyətin tənzimlənməsi” şöbəsinin aparıcı elmi işçisi, dosent Gülnar Səmədova və “İqtisadi tədqiqatların riyazi təminatı” şöbəsinin kiçik elmi işçisi Xəzər Abbaszadə iştirak ediblər. G.Səmədova “Azərbaycan və Çin Xalq Respublikası arasındakı siyasi-iqtisadi münasibətlərdə turizmin rolu və əhəmiyyəti”, X.Abbaszadə “Bir Qurşaq - Bir Yol təşəbbüsü, Orta Dəhliz və Yaşıl Enerji layihələri çərçivəsində iki xalqın geosiyasi yaxınlaşması” mövzularında çıxış ediblər. Suallar cavablandırılıb, maraqlı müzakirələr aparılıb.
