Mayın 8-də Elm və Təhsil Nazirliyi İqtisadiyyat İnstitutunda 10 May - Azərbaycanın Ümummilli Lideri Heydər Əliyevin anadan olmasının 103-cü ildönümünə həsr olunmuş tədbir keçirilib. Tədbirdə institutun rəhbərliyi, alim və tədqiqatçıları iştirak ediblər.
Tədbir Azərbaycan Respublikasının Dövlət Himninin səsləndirilməsi və Ümummilli Lider Heydər Əliyevin əziz xatirəsinin bir dəqiqəlik sükutla yad edilməsi ilə başlayıb.
Sonra Ümummilli Lider Heydər Əliyevin həyat və fəaliyyətini əks etdirən videoçarx nümayiş olunub.
Tədbirdə ETN İqtisadiyyat İnstitutunun baş direktoru, professor Nazim Müzəffərli bildirib ki, Heydər Əliyev müasir müstəqil Azərbaycan dövlətinin memarı və qurucusudur. O qeyd edib ki, Ümummilli Liderin uzaqgörən siyasəti nəticəsində ölkədə siyasi sabitlik təmin olunub, milli dövlətçilik ənənələri möhkəmləndirilib, iqtisadi inkişafın əsasları yaradılıb. Baş direktor vurğulayıb ki, Heydər Əliyevin müəyyən etdiyi inkişaf strategiyası bu gün də Azərbaycan dövlətinin davamlı tərəqqisinin əsasını təşkil edir.
Baş direktor həmçinin bildirib ki, bu gün Prezident İlham Əliyev Ümummilli Liderin siyasi kursunu uğurla davam etdirir. Onun sözlərinə görə, Azərbaycanın son illərdə qazandığı mühüm siyasi və iqtisadi uğurlar, ölkənin beynəlxalq nüfuzunun artması, eləcə də işğaldan azad olunmuş ərazilərdə həyata keçirilən genişmiqyaslı bərpa və quruculuq işləri Heydər Əliyev siyasi məktəbinin uğurlu davamının göstəricisidir.
N.Müzəffərli vurğulayıb ki, azad edilmiş ərazilərdə müasir infrastruktur layihələrinin həyata keçirilməsi, yeni şəhər və kəndlərin salınması, sənaye və kənd təsərrüfatı potensialının yenidən formalaşdırılması Azərbaycanın güclü iqtisadi imkanlarını və dövlət siyasətinin strateji xarakterini nümayiş etdirir. Qarabağ və Şərqi Zəngəzurun yenidən qurulması ölkənin sosial-iqtisadi inkişafında yeni mərhələnin başlanğıcı hesab oluna bilər.
AMEA-nın müxbir üzvü, professor Şahbaz Muradov Heydər Əliyevin Azərbaycan elminin, təhsilinin və milli intellektual potensialının inkişafına göstərdiyi diqqət və qayğıdan bəhs edib. Professor bildirib ki, Ümummilli Liderin hakimiyyəti dövründə elmi-tədqiqat müəssisələrinin fəaliyyətinin gücləndirilməsi, yüksək ixtisaslı kadrların hazırlanması və milli elmi məktəblərin formalaşdırılması istiqamətində mühüm addımlar atılıb.
Ş.Muradov vurğulayıb ki, Heydər Əliyevin dövlətçilik fəlsəfəsinin əsasını milli maraqların qorunması, güclü iqtisadiyyatın qurulması və xalqın rifahının yüksəldilməsi təşkil edib. Onun sözlərinə görə, bu siyasi kurs hazırda Azərbaycan Prezidenti İlham Əliyev tərəfindən uğurla davam etdirilir və ölkənin hərtərəfli inkişafına xidmət edir.
Tədbirdə çıxış edən digər iştirakçılar da Heydər Əliyevin Azərbaycan xalqı və dövləti qarşısındakı misilsiz xidmətlərindən danışaraq onun zəngin siyasi irsinin gələcək nəsillər üçün mühüm örnək olduğunu qeyd ediblər.
