Mayın 13-də Elm və Təhsil Nazirliyinin İqtisadiyyat İnstitutunun Elmi Şurasının növbəti iclası keçirilmişdir. Baş direktor, professor Nazim Müzəffərlinin sədrliyi ilə keçirilən toplantıda bir sıra təşkilati və cari məsələlər müzakirə olunmuşdur.
İqtisadiyyat İnstitutunun baş meneceri Şakir Alıyev ildə bir dəfə İnstitutda aparılan inventarizasiya tədbirləri, əməkdaşların avadanlıqlardan istifadə etməsi qaydaları barədə məlumat verdi, işçilərin işə davamiyyəti ilə bağlı məsələlərdən danışdı.
Elmi Şurada İqtisadiyyat İnstitutunun Regional inkişaf və təbii sərvətlərdən istifadə problemləri şöbəsinin aparıcı elmi işçisi, i.f.d. Məzəddin Əyyubov “Azərbaycanda bərpa olunan alternativ enerji ehtiyatlarından istifadənin ekoloji problemləri” mövzusunda məruzə ilə çıxış edib. Məruzəçi bərpa olunan alternativ enerji ehtiyatlarından istifadə edilməsi məsələsinin qlobal miqyasda gündəmə gətirilməsi səbəblərindən, ekoloji problemlərin kəskinləşməsindən danışıb. Qeyd edib ki, neft, qaz, daş kömür kimi yanacaq ehtiyatlarının yanması prosesində atmosferə karbon qazı ilə yanaşı digər zəhərli maddələr atılır. Habelə yanacaq ehtiyatlarının yanması prosesində yüksək tempratur yaranır və çoxsaylı İES-nın fəaliyyəti nəticəsində atmosferə atılan istilik hesabına atmosferin orta temperaturu artmağa başlayır. Nəqliyyat vasitələrinin yandırdığı yanacaq da (benzin, dizel) yanma prosesində atmosferə karbon qazı ilə yanaşı digir zəhərli maddələr atılır. Bu prosesin atmosferin tempraturunu artırması ilə yanaşı, atmosferin çirklənməsini artıran amil hesab olunur. Bu səbəbdən ilk növbədə neftdən alınmış yanacaqla işləyən avtomobillərin sayının məhdudlaşdırılması, elektriklə işləyən avtomobillərin sayının artırılması məqsədəuyğun hesab edilir. Lakin nəzərə almaq lazımdır ki, hazırda elektrik avtomobillərin akkumlyatorlarının doldurulması İES-da hasil edilən elektrik enerjisi vasitəsi ilə həyəta keçirilir. Bu isə İES-da əlavə elektrik enerjisinin hasil edilməsini tələb edir.
M.Əyyubov Azərbaycanda bərpa olunan alternativ enerji mənbələrindən istifadə imkanları, regionlarda günəş və külək enerjisi potensialı, ölkəmizdə alternativ bərpa olunan olunan enerjidən istifadənin ekoloji problemlərini də qeyd edib.
Sonra mövzu ətrafında geniş müzakirələr aparılmış, suallar cavablandırılmışdır (economics.org.az).
