Elm və Təhsil Nazirliyinin İqtisadiyyat İnstitutunun baş direktoru professor Nazim Müzəffərlinin rəhbərliyi ilə iqtisadçı alimlərdən ibarət bir qrup nümayəndə heyəti Veysəloğlu Şirkətlər Qrupunu (VŞQ) ziyarət edib. Veysəloğlu Şirkətlər Qrupu Azərbaycanın qeyri-neft sektorunda ölkə iqtisadiyyatına əhəmiyyətli töhfələr verən ən iri işəgötürənlərindən biridir. Gündəlik tələbat məhsulları (FMCG) sektorunda ixtisaslaşan Şirkətlər Qrupuna distribusiya, istehsalat və pərakəndə mağazaçılıq fəaliyyətləri üzrə xidmət göstərən şirkətlər daxildir.
Əvvəlcə qonaqlar şirkətə aid Məhəmmədi qəsəbəsindəki Logistika Mərkəzi və “Xonça” fabrikinin fəaliyyəti ilə yaxından tanış olublar. “Xonça” fabrikində müəssisənin direktoru Rəhman Ələkbərovun müşayiəti ilə bütün istehsal prosesini izləyiblər. R.Ələkbərov bildirib ki, 2016-cı ildə fəaliyyətə başlayan “Xonça” fabriki ölkənin şirniyyat sahəsində milli brenddir. Fabrikin hazırda “Araz” supermarketlər şəbəkəsinin 180 mağazasında bölməsi mövcuddur. 2019-cu ildə bütün məhsulların donmuş formada istehsalı, saxlanılması və satışına başlanılıb. Beləliklə, “Xonça” Fabriki bütün çörək, bulka və tort çeşidlərinin donmuş formada təminatı gücünə malik olub.
Fabrikin yaradılması şirkətin bütün satış sahələrində keyfiyyəti bir mərkəzdə birləşdirərək standart keyfiyyət və gigiyenanı təmin etmək məqsədi daşıyıb. Bu məqsəddən çıxış edərək marketlər daxilində məhsul istehsalı dayandırılıb, yalnız mərkəzləşmiş donmuş və bişmiş məhsul istehsalına nail olunub. Fabrikin istehsal etdiyi məhsulların siyahısına müxtəlif növ ətirli çörəklər, bulkalar, Şərq və Avropa kulinariyasına məxsus tort və şirniyyatlar, paketli hazır məhsullar daxildir. “Xonça” Fabrikindən donmuş yarımfabrikat olaraq təmin edilən məhsullar mağazada fermentasiya prosesini keçərək bişirilir və müştərilərə təqdim edilir.
“Xonça” Fabriki İsveçrənin Beynəlxalq Sertifikatlaşdırıcı orqanı SGS Ltd (https://www.sgs.com/en) tərəfindən qida təhlükəsizliyinin idarə edilməsi sistemi üzrə sertifikata (ISO 22000:2018) layiq görülüb. “Xonça” Fabrikində qida təhlükəsizliyi idarəetmə sistemi mayalı və mayasız un-qənnadı və çörək-bulka məmulatlarının, o cümlədən tortlar, milli şirniyyatlar istehsalı sahəsində tətbiq edilib.
İqtisadiyyat İnstitutunun əməkdaşları Veysəloğlu Şirkətlər Qrupuna daxil olan, hazırda Azərbaycanın ən böyük logistika şirkəti olan “AVT logistics” şirkətinin anbarında olublar. 50 min kv. metr ərazini əhatə edən anbar Qafqazda ən böyüyüdür. “AVT logistics”in direktoru Anar Adilzadə qonaqları ən müasir avadanlıqlarla təchiz olunmuş, böyük imkanlara malik anbarın gündəlik fəaliyyəti ilə tanış edib.
İqtisadçılar “Veysəloğlu”, “Araz” və “Oba”nın Bakının mərkəzindəki ofisində iş şəraiti ilə yaxından tanış olublar. Sonra “Veysəloğlu” Şirkətinin ofisində şirkətin rəhbərliyi ilə iqtisadçılar arasında qarşılıqlı maraq doğuran mövzular ətrafında fikir mübadiləsi aparılıb. Veysəloğlu Şirkətlər Qrupunun baş icraçı direktoru Aydın Talıbov şirkətin qurulması, böyüməsi, bazarda özünəməxsus yeri, fəaliyyəti, inkişaf strategiyası, əsas hədəfləri barədə danışıb.
Şirkətin audit məsələləri üzrə Qrup CEO-nun müşaviri İlqar Nuri “Veysəloğlu”nun inkişaf dinamikası və gələcək perspektivləri ilə bağlı təqdimatla çıxış edib. Son 9 ildə 450 milyon manat investisiya yatırılan şirkətin 25 minə qədər əməkdaşı var. Hər il böyüyən şirkətdə ildə 2500 yeni iş yeri yaradılır, bu rəqəmin 3000-nə çatdırılması hədəflənir.
Görüşdə Azərbaycanda sahibkarlıq fəaliyyəti üçün yaradılan şərait, biznes mühiti, yerli istehsalın və ticarətin inkişafı problemləri, dövlət-özəl sektor əməkdaşlığı məsələləri ətrafında müzakirələr aparılıb. Qərara alınıb ki, İqtisadiyyat İnstitutu ilə “Veysəloğlu” şirkəti arasındakı əməkdaşlıq əlaqələri davam etdirilsin (economics.org.az).
